إنترفيو و إختبار بنك مصر 2013
=-=-=-=-=-=-==-=-=-=-=
بسم الله الرحمن الرحيم
(مَا يَفْتَحِ اللَّهُ لِلنَّاسِ مِن
رَّحْمَةٍ فَلا مُمْسِكَ لَهَا وَمَا يُمْسِكْ فَلا مُرْسِلَ لَهُ مِن بَعْدِهِ وَهُوَ الْعَزِيزُ الْحَكِيمُ)
صدق الله العظيم
حالياً فى تعديل فى سياسة البنك عن المتبعه سابقاً
فاصبح
اول انترفيو ده مجرد أسئله تعريفيه سهله جداً و البدايه إنجليش و بعد كده عربى
التانى حاجه عباره عن إختبار الجامعه الامريكيه
التالت عباره عن إنترفيو تانى فى البنك
الرابع عبراه عن إنترفيو إنتقائى مكون من لجنه جماعيه من 3 او 4 مديرين من البنك
الخامس عباره عن الكشف الطبى
و أخر حاااااجه بتكون التعيين طبعاً
و لازم كل خطوه تنجح فيها عشان توصل للى بعدها
و بالنسبه لعنوان اول إنترفيو فهو 45 ب ش قصر النيل الدور التانى ( داخل إدارة التدريب الخاصه ببنك مصر )
و هى عباره عن عماره بجانب فرع البنك
و هايكون مطلوب تحضروا معاكم للإطلاع
- أصل المؤهل
- أصل الموقف من التجنيد
- اصل البطاقه
بالنسبه لأسئلة اول إنترفيو فهى:
- عرفنى على نفسك
( طبعاً ده كله مكتوب فى السى فى بتاعك و المفروض انك تكون حافظه كويس بس تخلى بالكم انك و انتو بتقولوه مايظهرش إنكم حافظين و يظهر إنكم بتعرفوا تتكلموا إنجليش لان ده بيكون السؤال الوحيد الإنجليش )
- هل حابب كارير البنوك واله حابب بنك مصر
( الإجابه هاتكون حابب الكارير بشكل عام و بنك مصر بشكل خاص )
- تعرف إيه عن بنك مصر
( هاتقول كل المعلومات اللى تعرفها عنه و جمعتها عنه )
- هل بعت السى فى بتاعك لبنوك تانيه
( إذا كنت بعت هاتقول اه بعت بس بعتت لبنك مصر اكتر من اى حد تانى لاإهتمامى الخاص و حبى للبنك )
- قولى 3 بنوك تحب تشتغل فيهم على الترتيب
( من وجهة نظرى - بنك مصر - بنك مصر - بنك مصر )
- إيه اللى يخلينى اختارك , إيه الحاجه اللى موجوده فيك و مش موجوده - فى باقى المتقدمين اللى تخلينى اختارك عشانها
( هاتجيب ميزه او اكتر تميزك عن غيرك و تكون واثق جداً من نفسك و إنت بتتكلم عشان هايحاول يدايقك و يقولك ان الميزه دى موجوده فى غيرك هاتلى حاجه غيرها و لما تجيب غيرها هايقولك برضو موجوده هاتلى غيرها و كده يعنى )
- هاتلى قرار صعب إتخذته فى حياتك و إتصرفت معاه إزاى , موقف صعب و حليته إزاى
- كام واحد منتظر بره دلوقتى ( عشان يقيس قدرتك على التركيز )
- هاتلى حاجه كرياتيفتى ( إبتكاريه ) إنت عملتها فى حياتك
- عملت إيه لما جالك التليفون بميعاد الإنترفيو فى بنك مصر
( و المفروض انك تقوله حضرت نفسك إزاى و جمعت بيانات إزاى عن البنك )
- و بعدين يقولك ال أتش أر مشكله من عنده و يقعد يناقشك فيها
( و كل إجابه تقولها يقولك مش مقتنع مش مصدق الكلام ده هاتلى إجابه اوضح ( و ده بيكون هدفها قياس قدرتك على الإقناع ) )
.........................................................................
و بالنسبه لأسئلة إختبار الجامعه الامريكيه فهى
كالتالى
1- رسالة هتوصلك من بنك مصر هيولك فيها
الامتحان في الجامعة الامريكية يوم ... الساعة ... صباحا يرجي احضار اصل المؤهل واصل شهادة الجيش والبطاقة واله حاسبة وقلم رصاص
2- الاتش ار هيكلمك ويقولك انا كذا اتش ار بنك مصر . وصلتلك رسالة من بنك مصر بميعاد الانترفيو ؟
اه وصلتنى يا افندم
هيقولك طيب ياريت تبقى توصل فى الميعاد ان شاء الله
فى
بنك مصر
151 ش محمد فريد - القاهرة
ومعاك الاوراق المطلوبة للإطلاع عليها
اصل شهادة الكلية + اصل شهادة الاعفاء + اصل البطاقة
واللى مش معاه مش مشكلة اهم حاجة يكون معاه صور منهم على الاقل
عادى بتمشى
بتاخد اقرار هناك انك مدحلتش الامتحان قبل كدا
لان الامتحان ده مرة بالعمر اللى مش بيعدى منه لقدر الله مش بيدخله تانى خالص
خطوة رقم واحد :
ابعت السي في بتاعك علي الايميلات دي خاصة يوم الاحد الصبح ويفضل ما تبعتش كتييييير عشان غلط انا شوفت الايميلات بنفسي علي جهاز واحد في الاتش ار وكان في واحد اسمه جورج كان بيبعت كل يوم يجي خمسين مرة وبتاع الاتش ار حلف لي بالله انه برده مش هيتصل بيه خاصة
انه كان غير مستوفي للشروط وكمان السي في بتاعه ما كانش مقنع .
بنك مصر
HR@banquemisr.com.eg
recruitment@banquemisr.com,
Hrmanager@banquemisr.com,
ahashoor@banquemisr.com,
Ayam@banquemisr.com,
Sayeda@banquemisr.com,
151 ش محمد فريد - القاهرة
الامتحان ،،،
الامتحان سهل جدا ان شاء الله عبارة عن 100 سؤال مقسمة الى جزئين
1- عبارة عن اسئلة محاسبية واسئلة انجليزى + قطعة ترجمة من عربى الى انجليزى ودى مدتها
ساعتين
والجزء ده عبارة عن حوالى 45 ورقة وشكل الاسئلة السؤال باللغتين العربية والانجليزية ده تسهيل على الشباب اللى بتكون ضعيفة فى اللغة الانجليزية
2- عبارة عن اسئلة اى كيو ودى مدتها ساعة
نصيحة منى السؤال مياخدش اكتر من دقيقة لو هتتحير فيه سيبه واعمل عليه علامة وابقى ارجعله تانى ان شاء الله لو لحقت
طبعا فى ميعادين للاختبار واحد بيبتدى من الساعة 9.30 ولمدة 3 ساعات
والثانى الساعة 1 ظهرا وبينتهى بعد 3 ساعات برده
تفاصيل الامتحان ..
=-=-=-=-=-=-=
مقسم الى اجزاء
اولا جزء المحاسبة والتسويق والاقتصاد...
ـــــــــــــــــــ
- انتاجية العمالة = كمية الانتاج مقسومة علي كثافة العمال
- الاداة التي تستخدمها الشركة لتذكير السوق وتعريف العملاء بها الدعاية
- تعريف الناتج المحلي هو كمية السلع والخدمات المنتجة محليا خلال فترة معينة وخلي بالكم عشان في ضمن الاجابات بدل كلمة المنتجة كلمة المستهلكة .
- الاقتصاد الذي ليس له تعامل مع الدول خارجيا هو اقتصاد مغلق وليس اقتصاد مركزي او معزول
- تحرك منحني الطلب الي اليمين يؤدي الي زيادة الكمية وارتفاع السعر
- تحرك منحني الطلب الي اليسار يؤدي الي انخفاض الكمية وانخفاض السعر
- تحرك منحني العرض الي اليمين يؤدي الي زيادة الكمية وانخفاض السعر
- تحرك منحني العرض الي اليسار يؤدي الي انخفاض الكمية وارتفاع السعر
- الايرادت الغير مكتسبة ضمن الخصوم
- الايرادات المستحقة ضمن الاصول
- المصروفات المقدمة ضمن الاصول
- المصروفات المستحقة ضمن الخصوم
- اسهم الخزينة ضمن حقوق الملكية والسبب وراء عدم اظهارها في جانب الاصول الي ان الشركة لا يمكنها ان تملك اسهمها وتتاجر فيها كإستثمارات .
- سؤال صافى الاصول هو حقوق الملكيه
- لو تم بيع اله سينخفض مصروف الاهلاكوليس مجمع الاهلاك
- انسب طرق الدعايه للسلع الاستهلاكيه هي الاعلان
- انسب طرق الدعاية للسلع الصناعية هي البيع الشخصي
- لو العميل مؤمن بان جوده المنتج مرتبطه بسعره يبقى كلما زاد السعر يعنى ايه طبعا الاجابه جوده افضل
- يعتبر الاتي من طرق قياس الاهلاك طبعا الاجابة رقم اتنين اللي هي بتاعت القسط المتناقص
- اصدار سندات ده قرار تمويلي وليس استثماري او تشغيلي
- لو الشركة تتعامل مع الايردات عند تحصيلها فعلا والمصروفات عند صرفها فعلا ده اسمه الاساس النقدي خلوا بالكم لان السؤال ده متجاوب غلط ع المنتدي ودي اجابته الصح انه اساس نقدي
- الاصل الذي ليس له اهلاك هو الاراضي
- اذا كان هناك مصروف تامين مقدم ولم يتم خصم الجزء المستهلك منه خلال الفترة ده طبعا هيؤدي لظهور الاصول بقيمة اكبر من قيمتها لان التامين المقدم ده مصروف مقدم يبقي من الاصول وبالتالي عدم خصمه يعني زيادة في قيمة الاصول
- قائمة الدخل توضح نتيجة عمل المنشأة من ربح او خسارة ونتيجة ما حققته من ايردات او مصروفات
_________
ثانيا جزء الانجليش
ـــــــــــــــــــ
بعد كده اسئلة الانجليزي رخمة شوية عبارة عن كلمات بس السهل الممتنع ومش قواعد جرامر زي ما احنا فاهمين بالمعني يعني ممكن تقول انها جرامر متوظف في مواقف واسئلة في الثقافات الامريكية والانجليزية والادب الانجليزي والعلامء يعني اسئلة تعتمد علي ثقافتك الانجليزية ده علاوه عن اجادتك للغة وبعد كده اسئلة انجليزي جملة فيها كلمات تحتها خط وفي كلمة من الكلمات اللي تحتها خط دي غلط والمفروض تختاار الاجابة من الكلمات دي اللي تحتها خط
___________
ثالثا الترجمة...
ـــــــــــــــــــ
بعدين قطعة تترجمها من عربي الي انجليزي
فى اغلب دول العالم يوجد بنك مركزى باختلاف اسمه حيث فى امريكا اسمه النظام الفيدرلى المركزى وفى مصر يسمى البنك المركزى المصرى واغلب مسئوليات البنك المركزى فى اغلب الدول متشابهة والبنك المركزي يحدد السياسة النقدية للدولة ويقوم بالرقابة علي النظام المصرفي كما ان البنك المركزي يلعب دورا هاما في زيادة التنميه الاقتصاديه .
In the most countries in the world there is a central bank which named in USA (the Federal Reserve Bank) and in Egypt named (the central bank of Egypt) however that, the most responsibilities of the central bank in the most countries are similar.
The central bank issue the monetary policy and control over the banking system, in addition to that the central bank plays an important role in financing the economic development projects.
_____________________
رابعا المعلومات العامة
ـــــــــــــــــــ
محافظ البنك المركزي فاروق العقدة
رئيس البورصة ماجد شوقي ( غريبة قوي انهم حتي ما عدلوش اسم رئيس البورصة الجديد محمد عبد السلام )
مؤشر البورصة إجي اكس 30 وليس كاس 30
اكبر بنكين حكومين هم البنك الاهلي وبنك مصر ( دي حاططها منظرة منه عشان يفكرك انه بنك كبير )
شركة cil تعمل في التامين وهي تبع السي اي بي
بنك بلوم تبع دولة ايه طبعا لبنان وبنك بيروس ده يوناني وبنك بي ان بي باربيا ده فرنسي هو وال NSGB
ما هى عمله الكويت الدينار الكويتي ( ليبيا وتونس والجزائر تتعامل بالدينار )
_____________________
خامسا الاي كيو
ـــــــــــــــــــ
دي بقي ملزمة تانية فيها الاي كيو حوالي 15 او 20 سؤال منها الاسئلة دي
لو بائع بيبيع 6 زجاجات كوكاكولا بمبلغ 2.40 دولار وهو فى هذه الحاله يكون قد خصم 10 % من ثمن الزجاجه الواحده . فكم ثمن الزجاجه الواحده ؟
1- 0.35
2- 0.40
3- 0.44
4- 0.50
5- 0.55
طبعا الاجابة 44
اقسم ال 2.40 علي 6 هتساوي 0.4 اضربها في 100 علي 90 ( 100% - 10 % ) هتساوي 0.44
_____________________
اذا كان هناك عدد 25 تفاحه وكان احمد سيأخذ 4 اضعاف عدد ما سيأخذ محمد . فكم سيأخذ احمد ؟
1- 5
2- 10
3- 15
4- 20
الاجابة واحد هياخد 20 وواحد هياخد 5 لان اربع اضعاف يعني لو هياخد 5 يبقي 4 في 5 هتساوي 20
______________________________
3-اذا كان 4 عمال يستطيعون بناء حائط فى ساعه . فكم يلزم من الوقت 5 عمال لبناء نفس الحائط ؟
1- 45 دقيقه .
2- 48 دقيقه .
3- 55 دقيقه .
4- 65 دقيقه .
دي الاجابة تساوي 48 دقيقة بالتمام والكمال .
الرقم 2321 لو اتقري بالمقلوب هيبقي 1232 بس طبعا الرقم مكتوب باللغة العربية الفصحي الفان وثلاثمئة وواحد وعشرون
الصباع للخاتم زي الاذن لل ... الحلق
وسؤال بيقول ان سارة ذكاءها 135 واختها مش فاكر اسمها ذكائها اقل منها يساوي 120 وذكاء شادي اعلي من ذكاء سارة وذكاء احمد اقل من ذكاء شادي واعلي من ذكاء اختها يبقي الترتيب تصاعدي اختها بعدين احمد بعدين سارة بعدين شادي تقريبا مش متأكد من الاسامي .اسئلة الاشكال سهلة وموجودة في كل حتة هما حوالي 3 اشكال بس
_____________________
سادسا المواقف الشخصية
ـــــــــــــــــــ
المواقف الشخصية بتاعت خدمة العملا دي منها مثلا
ان العميل وزوجته خايفة من القرض وانت صفتك في خدمة العملاء بتقوله حاجة معينة من الخيارات هي اللي تنفع من بين الخيارات كلها
وكمان العميل لقي مصاريف 9 دولارات زيادة مخصومين من الحساب بتاعه
وكمان العميل لقي ان لأكثر من مرة البنك بيرد له شيك لعدم وجود رصيد رغم انه رصيدي يكفي وبالتالي يسبب له احرج
وكمان المواقف التانية يعني مواقف هل توافق او لا توافق وتعليل الاجابة في حالة الرفض منها
( في النهاية يمكنني الاعتماد علي نفسي فقط ) هل تقول هذه الجملة ....
وكمان في حالة توصلك لقرار معين يكون الاستماع لأراء الاخرين مضيعة للوقت
وتكون الحلول التقليدية هي افضل حلول للمشكلات دائما
وكمان تبدأ عملية اتخاذ القرار بإختيار بديل واحد والعمل علي تطبيقة
ان شاء الله كل ما افتكر حاجة هكتبها
طبعا الاجابة تختلف من شخص للتاني وكله عربي او انجليزي زي ما قلنا قبل كده
==================================
ده ملف فيه تفاصيل كل شئ عن البنوك والمحاسبة وكافة المعلومات اللى ممكن تحتاج ليها
==================================
بالتوفيق إن شاااء الله
